Тибқи таҳлилҳо муайян гардид, ки маблағгузории нигоҳдории роҳҳо, ки аз буҷети давлатӣ амалӣ мегардад, нисбати суръати рушди бунёду азнавсозии роҳҳо ба дараҷаи ниҳоят паст мебошад. Ба ҳолати имрӯза барои нигоҳдории  яксолаи як километри роҳи бо маблағи 244 396 сомонӣ бунёдгардида аз буҷаи ҷумҳуриявӣ ҳамагӣ 5 941 сомонӣ ҷудо мегардад. Чунин фарқияти калон ба пойдории дороиҳои бо маблағи зиёд бунёдшуда, таъсири манфӣ расонда ба пеш аз муҳлати меъёрӣ вайрону валангоршавии онҳо боис мегардад.

Инчунин тибқи таҳлилҳои коршиносони байналмилали дар сурати ингуна маблағҷудокунӣ барои нигоҳдории роҳҳои автомобилгарди истифодаи умум эҳтимолӣ пурра вайрон гардидани роҳҳои автомобилгарди бунёдгардида мегардад.

Агар ягон амал андешида нашавад, ташкил, таъсис ва фаъолияти фонди мазкур дуруст ба роҳ монда нашуда, барои нигоҳдории роҳҳо аз буҷети давлатӣ маблағҳои зиёд ҷалб карда мешавад.

Лоиҳаи қарори Ҳукумати Ҷумҳурии Тоҷикистон оид ба тасдиқи Тартиби ташаккулдиҳӣ ва истифодаи Фонди роҳи назди Вазорати нақлиёти Ҷумҳурии Тоҷикистон бо мақсади иҷрои супориши Дастгоҳи иҷроияи Президенти Ҷумҳурии Тоҷикистон аз 28 декабри соли 2021, №427(27-2) вобаста ба моддаи 33 қарори Маҷлиси Олии Ҷумҳурии Тоҷикистон аз 25 апрели соли 2018, №1069 оид ба қабул кардани Қонуни Ҷумҳурии Тоҷикистон “Дар бораи ҳаракат дар роҳ” ва қарори Ҳукумати Ҷумҳурии Тоҷикистон “Дар бораи Барномаи ҷорӣ намудани низоми идоракунии дороиҳои роҳ дар Ҷумҳурии Тоҷикистон барои солҳои 2021-2024” аз 31 декабри соли 2020, №706 ба тасвиб расидааст, аз ҷониби Вазорати нақлиёти Ҷумҳурии Тоҷикистон таҳия гардидааст.

Дар лоиҳа чораҳои зерин пешбинӣ карда мешаванд:

- баррасӣ, муайян ва тасдиқи самтҳои асосӣ ва афзалиятҳои фаъолияти Фонди роҳ, вазифаҳои дарозмуддат ва вазифаҳои ҷорӣ;

- муайян ва мувофиқа намудани сохтор, басти вазифаҳо, меъёрҳо ва дигар нишондиҳандаҳои соҳаи роҳдорӣ;

- назорат оид ба истифодаи мақсадноки маблағҳои Фонди роҳ;

- муайян намудани манбаҳои фонди роҳ;

- муайян намудани самтҳои хароҷоти маблағҳои фонди роҳ;

- муайян намудани тартиби таҳияи буҷети фонди роҳ;

- назорати истифодаи маблағҳои фонди роҳ.

Таҷрибаи ҷаҳонӣ собит менамояд, ки ҳалли мушкилиҳои ҷойдошта танҳо дар мавриди таъсиси Фонди роҳ имконпазир мегардад ва бидуни таҳияи чунин санади меъёрии ҳуқуқӣ ба танзим даровардани муносибатҳо вобаста ба ташкил ва таъсис намудани фонди роҳ, муайян намудани тартиб, самтҳои хароҷот ва назорати фонди мазкур ғайриимкон мебошад.

Даромади Фонди роҳ ғайри буҷаи давлатӣ буда, мақоми олии идоракунии  Шӯрои нозирони Фонди роҳ мебошад, ки аз ҷониби роҳбарони Шӯро, ки аз роҳбарони аввали сохторҳо (Вазоратҳои адлия, молия, рушди иқтисод ва савдо, нақлиёт, Кумитаи андози назди Ҳукумати Ҷумҳурии Тоҷикистон, Прокуратураи генералии Ҷумҳурии Тоҷикистон, Палати ҳисоби Ҷумҳурии Тоҷикистон ва Агентии назорати давлатии молиявӣ ва мубориза бо коррупсияи Ҷумҳурии Тоҷикистон) ташкил карда мешавад, лоиҳаи буҷети Фонди роҳ дар як вақт бо лоиҳаи Қонуни Ҷумҳурии Тоҷикистон дар бораи Буҷети давлатии Ҷумҳурии Тоҷикистон барои соли молиявии навбатӣ баррасӣ ва тасдиқ карда мешавад.

Оқибатҳои иҷтимоии лоиҳаи мазкур:

• сатҳи хизматрасониҳо вобаста ба нигоҳдории роҳҳо баланд мегардад;
• сифати роҳҳои автомобилгард баланд мегардад;
• ҳуқуқҳои соҳибони воситаҳои нақлиёт ҳифз мегардад.

Оқибатҳои иқтисодии лоиҳаи мазкур:

• сармоягузорӣ вобаста ба нигоҳдории роҳҳо аз ҳисоби бахши хусусӣ зиёд мегардад;
• маблағҳо вобаста таъмир ва нигоҳдории роҳҳои автомобилгарди истифодаи умум, харидории техника ва таҷҳизот, таъмини бехатарии ҳаракат дар роҳ, манбаъҳои таълимӣ ва дигар хароҷотҳо самаронок истифода мешаванд.