Лоиҳаи қарори Ҳукумати Ҷумҳурии Тоҷикистон «Дар бораи Тартиби ташаккулдиҳӣ ва истифодаи Фонди роҳи Ҷумҳурии Тоҷикистон» бо мақсади иҷрои супориши Дастгоҳи иҷроияи Президенти Ҷумҳурии Тоҷикистон аз 28 декабри соли 2021, №427(27-2) вобаста ба моддаи 33 қарори Маҷлиси Олии Ҷумҳурии Тоҷикистон аз 25 апрели соли 2018, №1069 оид ба қабул кардани Қонуни Ҷумҳурии Тоҷикистон “Дар бораи ҳаракат дар роҳ” ва қарори Ҳукумати Ҷумҳурии Тоҷикистон “Дар бораи Барномаи ҷорӣ намудани низоми идоракунии дороиҳои роҳ дар Ҷумҳурии Тоҷикистон барои солҳои 2021-2024” аз 31 декабри соли 2020, №706 ба тасвиб расидааст, аз ҷониби Вазорати нақлиёти Ҷумҳурии Тоҷикистон таҳия гардидааст.

Тартиби ташаккулдиҳӣ ва истифодаи Фонди роҳи Ҷумҳурии Тоҷикистон аз 8 боб 44 банд иборат буда, асосҳои ҳуқуқӣ ва иқтисодии фаъолияти Фонди роҳи Ҷумҳурии Тоҷикистонро муқаррар намуда, бо мақсади истифодаи оқилона ва самараноки маблағҳои воридшудае, ки аз буҷети ҷумҳуриявӣ, буҷети маҳаллӣ, грантҳо, қарзҳо, сармоягузориҳои дохилӣ ва манбаъҳои дигар, ки тибқи қонунгузорӣ пешбинӣ шудааст, барои сохтмон, таъмир ва нигоҳдории роҳҳои автомобилгарди истифодаи умум, харидории техника ва таҷҳизот, таъмини бехатарии ҳаракат дар роҳ, манбаъҳои таълимӣ ва дигар хароҷоту ваколатҳоро муайян менамояд.

Дар лоиҳа чораҳои зерин пешбинӣ карда мешаванд:

- баррасӣ, муайян ва тасдиқи самтҳои асосӣ ва афзалиятҳои фаъолияти Фонди роҳ;

- муайян ва мувофиқа намудани сохтор, басти вазифаҳо, меъёрҳо ва дигар нишондиҳандаҳои соҳаи роҳдорӣ;

- назорат оид ба истифодаи мақсадноки маблағҳои Фонди роҳ;

- сарчашмаҳои ташаккулдиҳии маблағҳои Фонди роҳ;

- муайян намудани самтҳои истифодаи мақсадноки маблағҳои фонди роҳ;

- идоракунии маблағҳои Фонди роҳ;

- муайян намудани тартиби таҳияи буҷети фонди роҳ;

- назорати истифодаи маблағҳои фонди роҳ.

Чорабиниҳои фаҳмондадиҳӣ оид ба муносибатҳо вобаста ба ташкил ва таъсис намудани фонди роҳ, муайян намудани тартиб, самтҳои хароҷоти фонди мазкур бо субъектоне, ки дар муносибатҳо оид ба ташаккули фонди роҳ иштирок менамоянд, гузаронида шуд.