Айни замон фаъолияти ташкилотҳои қарзии молиявӣ бо коркард ва нигаҳдории иттилооти гуногун, ки қисми асосии он маълумоти махфии муштариён мебошад, алоқаманд аст. Ба маълумоти махфии муштариён бештар нусхаҳои ҳуҷҷатҳои онҳо, рақами суратҳисоб, бақияи суратҳисобҳо, маълумот дар бораи амалиётҳо ва ғайра дохил мешаванд. Ҳангоми кор бо ин маълумот, муҳим аст, ки он дастраси шахсони бегона нагардад, тағйир наёбад ва нобуд нашавад.  Бо дарназардошти маълумотҳое, ки дар ташкилотҳои қарзии молиявӣ нигоҳ дошта мешаванд, аҳамияти талабот барои ҳифзи иттилоот дар солҳои охир хеле афзудааст. Барои бо муваффақият амалӣ намудани талаботи зикргардида, ташкилотҳои қарзии молиявӣ зарур аст, то тадбирҳои муайянро андешанд.

     Азбаски Бонки миллии Тоыикистон мақоми танзиму назорати ташкилотҳои қарзии молиявӣ ба ҳисоб рафта, ҳар сол фаъолияти ташкилотҳои қарзии молиявиро мавриди санҷиш қарор медиҳад, то ҳол оиди ҳифзи иттилоот ва инфрасохтори технологияҳои иттилоотии ташкилотҳои қарзии молиявӣ талаботи стандартиро таҳия накардааст, ки барои мутобиқшавӣ асос шуда тавонад.

    Дар ҳолати қабул нагардидани талаботҳои мазкур ташкил ва таъмини фаъолияти боэътимоди соҳаи технологияҳои иттилоотӣ дар ташкилотҳои қарзии молиявӣ коста мегарданд.

     Мақсад аз қабули Талаботи мазкур таъмини амнияти иттилоот дар ташкилотҳои қарзии молиявӣ буда, он бо роҳи муқаррар намудани талаботи ҳадди ақал нисбати таъминоти техникию барномавии ташкилотҳои қарзии молиявӣ ба даст меояд.

      Дар доираи санади меъёрии ҳуқуқии мазкур масъалаҳои зерин муқаррар мегарданд:

• талабот ба инфрасохтор ва архитектураи технологияҳои инттилоотӣ;
• талабот ба шабакаи дохилӣ ва таҷҳизоти шабакавӣ;
• талабот барои дастрасии фосилавӣ;
• талабот барои дастрасӣ ба захираҳои интернет;
• талабот барои истифодаи почтаи электронии корпоративӣ;
• талабот ба вебсайтҳо ва барномаҳои веб;
• талабот барои назорати дастрасӣ ва аутентификатсия;
• талаботҳо ба сиёсати гузарвожа ва идоракунии гузарвожаҳо;
• талабот оид ба бехатарии таҷҳизот;
• талабот ба наб;
• талабот ба пойгоҳи додаҳо;
• талабот ба бонкдории электронӢ ва замимаи мобилӣ;
• талабот ба сатҳи омодагии кормандон дар соҳаи амният.

     Ба ҷуз қабул кардани Талаботи мазкур дигар роҳи ҳал кардани мушкилот вуҷуд надорад, зеро санади меъёрии дигаре, ки талаботи амнияти иттилоотиро бо тамоми ҷузъиёт муқаррар намояд мавҷуд нест. Қонунҳои Ҷумҳурии Тоҷикистон "Дар бораи ҳифзи иттилоот”, "Дар бораи ҳуқуқи дастрасӣ ба иттилоот”, "Дар бораи иттилоот” ва "Дар бораи иттилоотонӣ” масъалаҳои умумиро танзим намуда, талаботи мушаххасро пешбинӣ наменамоянд. Дар самт корҳои фаҳмондадиҳию омӯзишӣ, ки аз тарафи Бонки миллии Тоҷикистон гузаронида шудаанд, натиҷаи дилхоҳ надоданд.

      Қабули Талаботи мазкур аз буҷети давлатӣ хароҷоти иловагӣ талаб намекунад.

      Дар мавриди қабул гардидани Талаботи мазкур, ташкилотҳои қарзии молиявӣ аз оқибатҳои зерин дар амон мемонанд:

1. оқибатҳои иқтисодӣ:

- тағйир ёфтан ё нобуд шудани маълумотҳои муҳими ТҚМ, ки на танҳо зарари калони молиявӣ дорад, балки ба обрӯ ва эътибори ТҚМ низ таъсир мерасонад;

- хавфи паҳн шудани маълумоте, ки сирри далатӣ, тиҷоратӣ ё бонкӣ дорад;

- бад гардидани вазъи молиявию пардохтпазирӣ.

2. оқибатҳои иҷтимоӣ:

- аз даст додани боварию эътимоди муштариён;

- ихтисор шудани шумора ва штати кормандон.