Айни замон аз ҷониби ташкилотҳои қарзии молиявӣ ба муштариён хизматрасониҳои пардохтии гуногун дар заминаи технологияҳои иттилоотӣ-коммуникатсионии муосир ба таври фосилавӣ, аз қабили Интернет банкинг, бонкдории мобилӣ, ҳамёнҳои электронӣ пешниҳод шуда истодааст. Тибқи талаботи санадҳои меъёрии ҳуқуқии амалкунандаи Бонки миллии Тоҷикистон истифода намудани як қатор хизматрасониҳои бонкӣ, аз қабили гузоштани пасандозу амонатҳо, гирифтани маблағҳои қарзӣ бе кушодани суратҳисоби бонкӣ ва бастани шартнома бо муштариён ба таври фосилавӣ ғайриимкон мебошад. Барои иҷрои ин амал ба муштариён зарур аст, ки ба ташкилотҳои қарзии молиявӣ ё марказҳои хизматрасонии онҳо муроҷиат намуда, расмиёти пешниҳоди ҳуҷҷатҳои заруриро дар шакли коғазӣ анҷом дода, шартномаи дахлдорро ба имзо расонанд. Чунин тартиби коргузорӣ барои муштариён ниҳоят ноқулай буда, сарборӣ ва сарфи вақтро барои муштариён ва ташкилотҳои қарзӣ эҷод менамояд. Қайд кардан зарур аст, ки дар аксари кишварҳои тараққиёфтаи дунё истифода намудан аз чунин хизматрасониҳои бонкӣ бо назардошти пешрафти технологияҳои муосири молиявӣ имконияти ба таври электронӣ (фосилавӣ) ба роҳ монда шудааст.

Бо назардошти он, ки аксарияти аҳолии  Тоҷикистон дар минтақаҳои дурдаст истиқомат мекунанд, бастани шартнома бо муштариён ба таври фосилавӣ дастрасии аҳолиро ба хизматрасониҳои бонкӣ зиёд хоҳад кард. Инчунин, бояд қайд намуд, ки дар шароити имруза вобаста бо паҳншавии вируси сироятии COVID-19 имконияти нигоҳдории масофаи иҷтимоӣ берун аз мақсад нест. Бинобар ин, Бонки миллии Тоҷикистон лоиҳаи санади меъёрии ҳуқуқии мазкурро таҳия намуда, ба ин васила барои таъмини имконияти ба таври фосилавӣ аз хизматрасониҳои бонкӣ баҳраманд шудани муштариён мусоидат намояд.

Дар ҳолати ворид накардани тағйиру иловаҳои дахлдор ба санадҳои меъёрии ҳуқуқӣ ва таъмин накардани имконияти ба таври электронӣ (фосилавӣ) анҷом додани амалиётҳои бонкӣ, татбиқи технологияҳои муосири молиявиро дар фаъолияти ташкилотҳои қарзии молиявӣ ғайриимкон мегардонад. Инчунин, аҳолӣ наметавонад аз хизматрасониҳои осону қулай ва саривақтии ташкилотҳои қарзии молиявӣ истифода намояд.

Бонки миллии Тоҷикистон ҳамчун мақоми давлатии танзимгари фаъолияти низоми бонкӣ,бо мақсади таъмини шароити мусоид барои рушди хизматрасониҳои фосилавии бонкӣ ва васеъ намудани дастрасии аҳолӣ ба хизматрасониҳои бонкӣ, ворид намудани тағйиру иловаҳоро ба Дастурамали мазкур ва ба ин васила ҳалли мушкилоти ҷойдоштаро зарур мешуморад. 

Дар доираи лоиҳаи тағйиру иловаҳо ба Дастурамали мазкур масъалаҳои зерин мавриди танзим қарор мегиранд:

1.      Тартиби мушаххаскунии фосилавии шахсияти муштарӣ;

2.      Тартиби ба таври фосилавӣ бастани шартномаи суратҳисоби бонкӣ;

3.      Муқаррарот оид ба гузаронидани маблағҳои суратҳисоби муросилотии ташкилотҳои қарзии молиявӣ ҳангоми барҳамхурии ихтиёрии онҳо;

4.      Муқаррароти иловагӣ ҷиҳати коҳиш додани хавфҳо дар самти муқовимат ба қонунигардонии (расмикунонии) даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом ҳангоми аз ҷониби муштариён анҷомдодани муносибатҳои муросилотии фаромарзӣ.

Ба ҷуз ворид намудани тағйиру иловаҳо ба Дастурамали мазкур дигар роҳи ҳал кардани мушкилиҳо вуҷуд надоранд, зеро маҳз Дастурамали мазкур тартиби кушодан, бурдан, аз нав ба расмият даровардан ва бастани суратҳисобҳои бонкии бо пули миллӣ ва асъори хориҷӣ барои шахсони ҳуқуқӣ ва воқеӣ, резидентҳо ва ғайрирезидентҳои Ҷумҳурии Тоҷикистонро аз тарафи ташкилоти қарзии молиявӣ танзим менамояд. Бидуни ворид намудани тағйиру иловаҳо ба Дастурамали мазкурбо роҳҳои дигарҳал кардани мушкилиҳои ҷойдошта ғайриимкон мебошад.

Ворид намудани тағйиру иловаҳо ба Дастурамали мазкур аз буҷети давлатӣ хароҷоти иловагӣ талабнамекунад.

Татбиқ намудани раванди мушаххаскунии фосилавии муштарӣ як қатор афзалияту бартариҳорофароҳам меоварад, аз ҷумла:

Оқибатҳои иҷтимоии лоиҳаи мазкур:

-  барои сон ва қулай гардидани истифодаи хизматрасониҳои бонкӣ ва баланд гардидани саводнокии молиявии аҳолӣ ва муштариен мусоидат менамояд, зеро, барои ба таврӣ фосилавӣ худро мушаххас намудан истифодабарии таҷҳизотҳои муосири электронӣ аз қабили компютер, смартфон, планшет ва ғайра зарур мегардад;

-  барои коҳиш ефтани сарбории иловагии амалиётии ташкилотҳои қарзии молиявӣ, сарфаи вақт, тезонидани суръати пешниҳоди хизматрасонӣ ва ҷалб гардидани муштариёни нав заминаи мусоид фароҳам меорад;

Оқибати иқтисодии лоиҳаи мазкур:

-    мусоидат намудан ба вусъат ёфтани ҳисоббаробаркуниҳои ғайринақдӣ, ки дар натиҷа ба шаффоф гардидани ҷараёнҳои молиявӣ;

- коҳиш ёфтани ҳаҷми иқтисодиёти ғайрирасмӣ, афзоиши воридоти маблағҳои андоз ва зиёдшавии ҳаҷми амонатҳо.