Аз сабаби мавҷуд набудани санади меъёрии ҳуқуқӣ ташкилотҳои суғуртавӣ (азнавсуғуртакунӣ) тарифҳои суғуртавиро бе истифодаи услуби муайяни баҳисобгирӣ ба роҳ монда истодаанд, ки раванди мазкур дар ҳолати рух додани ҳодисаҳои суғуртавӣ таъсири манфии худро ба вазъи молиявии ташкилот мерасонад. Бинобар ин, Бонки миллии Тоҷикистон ҳамчун мақоми назорати суғуртавӣ ҷиҳати дуруст ба роҳ мондани баҳисобгирии тарифҳои суғуртавӣ, аз ҷумла ба таркиб, мазмун, тарз ва принсипҳои ҳисобкунии онҳо Талаботи мазкурро таҳия намудааст. Дар ҳолати муайянкунии андозаи нодурусти  тарифҳо аз лиҳози актуарӣ, эҳтимолияти иҷро нашудани уҳдадориҳо дар назди суғурташавандагон ва коҳиш наёфтани сатҳи хавфҳо ба вуҷуд меояд.

Бонки миллии Тоҷикистон Талаботи мазкурро дар асоси қисми 3 моддаи 25 Қонуни Ҷумҳурии Тоҷикистон “Дар бораи фаъолияти суғуртавӣ” таҳия намудааст. Мақсадҳои асосии он чунин мебошанд:  

- таъмини устувории молиявӣ ва пардохтпазирии ташкилотҳои суғуртавӣ (азнавсуғуртакунӣ);

- ҳимояи манфиатҳои истифодабарандагони хизматрасониҳои суғуртавии ташкилотҳои суғуртавӣ (азнавсуғуртакунӣ).

Дар Тартиби мазкур чораҳои зерин пешбинӣ карда мешаванд:

- услуби баҳисобгирии тарифҳои суғуртавӣ;

- талабот нисбат ба таркиб, мазмун, тарз ва принсипҳои баҳисобгирии тарифҳои суғуртавӣ;

- муайян намудани андозаи тарифҳои асосӣ ва коэффитсиенти онҳо ё ифодаи ниҳоии коэффитсиентҳои нишондодашуда.

Бонки миллии Тоҷикистон ҳамчун мақоми назорати суғуртавӣ бо мақсади таъсис ва нигоҳдории низоми суғуртавии устувор дар Ҷумҳурии Тоҷикистон ва ташаккули инфрасохтори бозори суғурта, қоидаҳои суғуртаи ташкилотҳоро мунтазам мавриди баррасӣ қарор дода, онҳоро мувофиқа менамояд.

Қайд намудан зарур аст, ки бидуни таҳияи чунин санади меъёрии ҳуқуқӣ ба танзим даровардани бозори суғурта, ба роҳ мондани рақобати озод, инчунин ҳалли мушкилиҳои ҷойдоштаи соҳавӣ ғайриимкон мебошад.

Қабули Талаботи мазкур аз буҷети давлатӣ хароҷоти иловагӣ талаб намекунад.

Оқибатҳои иҷтимоии лоиҳаи мазкур:

-    сатҳи хизматрасониҳои суғуртавӣ ба аҳолӣ беҳтар мегардад;

-    барои самаранок гузаронидани амалиётҳои суғуртавии (азнавсуғуртакунии) ташкилотҳои суғуртавӣ (азнавсуғуртакунӣ) такони ҷиддӣ мебахшад.

Оқибатҳои иқтисодии лоиҳаи мазкур:

-     ба ташкилотҳои суғуртавӣ (азнавсуғуртакунӣ) имкониятҳои васеъро барои мустаҳкам намудани вазъи молиявӣ фароҳам меорад;

-  сармоягузории ташкилотҳои суғуртавӣ (азнавсуғуртакунӣ) ба соҳаҳои гуногуни иқсисодиёти кишвар зиёд мегардад.