Дар қисми 1 моддаи 55 Кодекси граждании Ҷумҳурии Тоҷикистон аз 30 июли соли 1999 муқаррори оид ба аз ҷониби Ҳукумат муайян намудани тартиби ба номи шахси ҳуқуқӣ дохил кардани ишора ба номи пурра ё мухтасари расмӣ (номи давлат), ба реквизитҳои аснод ё маводи рекламавии шахси ҳуқуқӣ дохил кардани чунин ном ё унсурҳои рамзи давлатӣ пешбинӣ шуда буд, вале то ҳол ягон санади меъёрии ҳуқуқӣ доир ба масъалаи мазкур қабул нашудааст. Аз ин рӯ, дар амал бисёр баҳсу масъалаҳо вобаста ба ба номи шахси ҳуқуқӣ ворид намудани номи давлат, яъне “Ҷумҳурии Тоҷикисто” ё “Тоҷикистон”, тартиби гирифтани иҷозат ба он, хусусиятҳои истифодаи номи давлат дар номи шахси ҳуқуқӣ, мавҷуд мебошанд, ки бояд дар асоси санади меъёрии ҳуқуқии мушаххас ҳали худро ёбанд. Ҳамзамон, санаи 24 декабри соли 2022, №1918 Кодекси граждании Ҷумҳурии Тоҷикистон дар таҳрири нав бо номи Кодекси мадании Ҷумҳурии Тоҷикистон қабул шуд, ки аз 1 июли соли 2023 мавриди амал қарор дода мешавад, муқарраротро оид ба аз ҷониби Ҳукумати Ҷумҳурии Тоҷикистон муайн намудани тартиби ба номи шахси ҳуқуқӣ дохил кардани ишора ба номи пурра ё мухтасари расмӣ (номи давлат), инчунин ворид намудани чунин нишондод ё унсурҳои рамзҳои давлатӣ дар унсурҳои ҳуҷҷатҳо ё маводи рекламавии шахси ҳуқуқӣ, пешбинӣ менамояд. Аз ин рӯ, бо мақсади ҳал намудани баҳсҳо дар самти в ба номи шахси ҳуқуқӣ дохил кардани ишора ба номи пурра ё мухтасари расмии давлат қабули санади меъёрии ҳуқуқии мазкур зарур аст, зеро шахси ҳуқуқие, ки аз номи давлат баромад мекунад симо ва обруи давлатро муаррифӣ мекунад.

Лоиҳаи Тартиби мазкур дар асоси қисми 2 моддаи 55 Кодекси мадании Ҷумҳурии Тоҷикистон аз 24 декабри соли 2022, №1918 таҳия гардида, тартиби истифодаи номи пурра ё мухтасари расмӣ (номи давлат), яъне “Ҷумҳурии Тоҷикистон” ё “Тоҷикистон”, инчунин ворид намудани чунин нишондод ё унсурҳои рамзҳои давлатӣ дар унсурҳои ҳуҷҷатҳо ё маводи рекламавии шахси ҳуқуқиро танзим менамояд.

Дар лоиҳа чораҳои зерин пешбинӣ карда мешаванд:

• муайян намудани талабот ҷиҳати ба номи шахси ҳуқуқӣ дохил кардани ишора ба номи пурра ё мухтасари расмӣ (номи давлат), инчунин ворид намудани чунин нишондод ё унсурҳои рамзҳои давлатӣ дар унсурҳои ҳуҷҷатҳо ё маводи рекламавии шахси ҳуқуқӣ;
• пешниҳоди ариза ва ҳуҷҷатҳои зарурӣ барои гирифтани хулосаи мақоми ваколатдор;
• гирифтани иҷозат ҷиҳати ба номи шахси ҳуқуқӣ дохил кардани ишора ба номи пурра ё мухтасари расмӣ (номи давлат), инчунин ворид намудани чунин нишондод ё унсурҳои рамзҳои давлатӣ дар унсурҳои ҳуҷҷатҳо ё маводи рекламавии шахси ҳуқуқӣ;
• муайян намудани муҳлатҳо оид ба пешниҳоди ариза, хулоса ва гирифтани иҷозат.

Бо қабул гардидани лоиҳаи пешниҳодшуда тартиб ва расмиёти ба номи шахси ҳуқуқӣ дохил кардани ишора ба номи пурра ё мухтасари расмӣ (номи давлат), инчунин ворид намудани чунин нишондод ё унсурҳои рамзҳои давлатӣ дар унсурҳои ҳуҷҷатҳо ё маводи рекламавии шахси ҳуқуқӣ дақиқ муайян гардида, он ба татбиқи дуруст ва яксони муқаррароти қонунгузории амалкунанда мусоидат хоҳад намуд. Бидуни қабули чунин санади меъёрии ҳуқуқи ҳал намудани мушкилиҳои ҷойдошта, инчунин танзими масъалаи мазкур ғайриимкон мебошад.

Лоиҳаи мазкур хароҷоти иловагии молиявиро аз буҷети давлатӣ талаб наменамояд.

Оқибатҳои иҷтимоии лоиҳаи мазкур:

- сатҳи хизматрасониҳои вобаста ба масъалаи мазкур баланд мегарданд;

- шахсони ҳуқуқи дар асосӣ иҷозат дар номи худ метавонанд номи давлатро истифода намоянд;

- пешгирии ҳуқуқвайронкуниҳои дар самти истифодаи номи давлат;

- ҳимоя ва ҳифзи манфиатҳои давлат, инчунин ҳуқуқҳои шахсони ҳуқуқӣ ва соҳибкорони инфиродӣ.

Оқибатҳои иқтисодии лоиҳаи мазкур:

- рушди иқтисодиёти кишвар;

- рушди фаъолияти соҳибкории ватанӣ ва хориҷӣ.