Мавҷуд набудани санади меъёрии ҳуқуқии дахлдор, ки феҳристи ҳисобҳои тавозунӣ ва тавсири ҳисобҳои тавозуниро ба ташкилотҳои суғуртавӣ (азнавсуғуртакунӣ) муқаррар ва танзим менамояд.

   Ҷиҳати риояи муқаррароти қонунгузорӣ оид ба мутобиқ намудани фаъолияти ташкилотҳои суғуртавӣ (азнавсуғуртакунӣ) ба Стандартҳои байналмилалии ҳисоботи молиявӣ, Бонки миллии Тоҷикистон ҳамчун мақоми назорати суғуртавӣ тасмим гирифтааст, ки Феҳрист ва Тавсифи ҳисобҳои тавозуниро таҳия намояд.

   Дар ҳолати мавҷуд набудани Феҳрист ва Тавсифи ҳисобҳои тавозунӣ, раванди дурусти баҳисобгирии муҳосибӣ ва ҳисоботҳои молиявӣ  дар фаъолияти ташкилотҳои суғуртавӣ ба таври дуруст риоя карда намешавад, ки он боиси нодуруст ҷамъбаст гардидани ҳисоботҳои ташкилотҳои суғуртавӣ (азнавсуғуртакунӣ) мегардад.

   Бонки миллии Тоҷикистон Феҳрист ва Тавсифи ҳисобҳои тавозуниро бо мақсади ба Стандартҳои байналмилалии ҳисоботи молиявӣ мутобиқ намудани фаъолияти ташкилотҳои суғуртавӣ (азнавсуғуртакунӣ), рушди босамари бозори суғурта ва ташаккули низоми суғуртавии устувор дар Ҷумҳурии Тоҷикистон, инчунин афзун намудани саҳми соҳаи суғурта дар иқтисодиёти миллӣ таҳия ва қабул менамояд.

   Дар лоиҳаи Феҳрист ва Тавсифи ҳисобҳои тавозунӣ чораҳои зерин пешбинӣ карда мешаванд:

- асосҳо барои дуруст инъикос намудани дороиҳо, уҳдадориҳо, сармоя, даромад ва хароҷотҳои ташкилотҳои суғуртавӣ (азнавсуғуртакунӣ);

- муайян гардидани нақшаи ҳисобҳо ва тавсифи он;

- ба таври дуруст ва ба стандартҳои байналмилалӣ мутобиқ намудани  амалиётҳои муҳосибӣ аз ҷониби ташкилотҳои суғуртавӣ (азнавсуғуртакунӣ).

   Бонки миллии Тоҷикистон ҳамчун мақоми назорати суғуртавӣ танзими фаъолияти ташкилотҳои суғуртавӣ (азнавсуғуртакунӣ)-ро тибқи талаботи қонунгузории соҳа ба роҳ монда истодааст.

   Таҷриба нишон дод, ки бинобар сабаби мавҷуд набудани санади меъёрии ҳуқуқии дахлдор вобаста ба Феҳрист ва Тавсифи ҳисобҳои тавозунӣ, баҳисобгирии муҳосибӣ ва ҳисоботҳои молиявии ташкилотҳои суғуртавӣ (азнавсуғуртакунӣ) тибқи Стандартҳои байналмилалии ҳисоботи молиявӣ ба роҳ монда намешавад, ки ин омил боиси носаҳеҳ пешниҳод гардидани ҳисоботҳои молиявии ташкилотҳои суғуртавӣ (азнавсуғуртакунӣ)  ва рушд накардани соҳа гардидааст.

   Инчунин, набудани санади меъёрии ҳуқуқӣ оид ба Феҳрист ва Тавсифи ҳисобҳои тавозунӣ ба таъмин гардидани ҳуқуқу манфиатҳои қонунии суғурташавандагон, шахсони суғурташуда ва фоидагирандагон ҳангоми нодуруст ба ҳисоб гирифтани амалиётҳои муҳосибӣ, таъсири манфӣ мерасонад.

   Бидуни таҳияи чунин санади меъёрии ҳуқуқӣ, ки Қонуни Ҷумҳурии Тоҷикистон “Дар бораи фаъолияти суғуртавӣ” пешбинӣ намудааст, ҳалли мушкилиҳои ҷойдоштаи соҳавӣ ва ба танзим даровардани бозори суғурта ғайриимкон мебошад.

   Қабули Тартиб аз буҷети давлатӣ хароҷоти иловагӣ талаб намекунад.

   Оқибатҳои иҷтимоии лоиҳаи мазкур:

• риояи муқаррароти қонунгузорӣ аз ҷониби ташкилотҳои суғуртавӣ (азнавсуғуртакунӣ) таъмин мегардад;
• барои шаффофияти фаъолият ва ҳисоботҳои ташкилотҳои суғуртавӣ (азнавсуғуртакунӣ) мусоидат мекунад;
• барои баланд бардоштани эътимоди суғурташавандагон ва ҳифзи ҳуқуқҳои онҳо ҳангоми пардохту ҷубронҳои суғуртавӣ такони ҷиддӣ мебахшад;
• фаъолияти ташкилотҳои суғуртавӣ (азнавсуғуртакунии) кишвар ба Стандартҳои байналмилалии ҳисоботи молиявӣ мутобиқ мегардад;
• нуфузу эътибор ва саҳми соҳаи суғурта дар кишвар ва арсаи байналмилалӣ меафзояд.

Оқибатҳои иқтисодии лоиҳаи мазкур:

• риояи муқаррароти қонунгузорӣ аз ҷониби ташкилотҳои суғуртавӣ (азнавсуғуртакунӣ) таъмин мегардад;
• истифодаи самараноки маблағҳои ташкилотҳои суғуртавӣ (азнавсуғуртакунӣ) таъмин карда мешавад;
• андозсупории ташкилотҳои суғуртавӣ (азнавсуғуртакунӣ) ба таври дуруст ба роҳ монда мешавад;
• қонунвайронкуниҳо аз ҷониби ташкилотҳои суғуртавӣ (азнавсуғуртакунӣ) дар раванди баҳисобгирии амалиётҳои муҳосибӣ пешгирӣ карда мешавад;
• устувории молиявии ташкилотҳои суғуртавӣ (азнавсуғуртакунӣ) таъмин карда мешавад;
• сатҳи хавфҳои қобили пардохтпазирӣ ва бозорӣ паст мегардад.