Мақсад аз ворид намудани тағйиру иловаҳо ба Кодекси ҷиноятӣ ин муқаррар намудани ҷавобгарии ҷиноятӣ барои муомилоти ғайриқонунии моддаҳои сахттаъсир буда, ҳангоми қабул гардидани он зарурати ворид намудани иловаҳо ба Кодекси ҳуқуқвайронкунии маъмурӣ ба миён меояд. 

Зеро дар сурате, ки миқдори моддаҳои сахттаъсири мусодирашуда таркиби ҷиноятро ташкил надиҳанд, шахси содирнамудаи чунин кирдор аз ҷавобгарии ҳуқуқӣ дур мемонад. Чунки барои муомилоти ғайриқонунии моддаҳои сахттаъсир, ки таркиби ҷиноятро ташкил намедиҳад, айни ҳол ҷавобгарии маъмурӣ пешбинӣ нагардидааст.  

Бинобар ин, ба мақсад мувофиқ дониста мешавад, ки ба Кодекси ҳуқуқвайронкунии маъмурии Ҷумҳурии Тоҷикистон моддаҳои 128¹ илова карда шуда, барои муомилоти ғайриқонунии моддаҳои сахттаъсир  ҷавобгарии маъмурӣ муқаррар карда шавад.

Лоиҳаи мазкур аз 2 модда ва 2 банд иборат буда, муносибатҳо оид ба ғайриқонунӣ истеҳсол, тайёр кардан, коркард, соҳиб шудан, тасарруф, нигоҳ доштан, интиқол ё фиристодани  моддаҳои сахттаъсирро   танзим менамояд.

Лоиҳа бо дарназардошти таҷрибаи қонунгузории давлатҳои хориҷӣ ва таҷрибаи ҷумҳурӣ доир ба ворид намудани иловаҳо ба Кодекси ҳуқуқвайронкунии маъмурии Ҷумҳурии Тоҷикистон таҳия гардидааст.

Дар лоиҳа чораҳои зерин пешбинӣ карда мешаванд:

- муқаррар намудани ҷавобгарии маъмурӣ барои муомилоти ғайриқонунии моддаҳои сахттаъсир;

- лоиҳа ворид намудани калимаи “тасарруф” ба моддаи 128 КҲМ пешбинӣ шудааст. Мақсад аз ворид намудани иловаи мазкур муқаррар намудани ҷавобгарии маъмурӣ барои тасарруфи воситаҳои нашъадор, моддаҳои психотропӣ, прекурсорҳо ва моддаҳои сахттаъсир ҳангоми набудани аломатҳои таркиби ҷиноят мебошад.

Лоиҳаи қонуни мазкур аз ҳисоби буҷети давлатӣ маблағгузориро талаб намекунад.

Оқибатҳои иҷтимоии лоиҳаи мазкур:

• ҳангоми набудани аломатҳои таркиби ҷиноят ҷавобгарии маъмурӣ барои тасарруфи воситаҳои нашъадор, моддаҳои психотропӣ, прекурсорҳо ва моддаҳои сахттаъсирро пешбинӣ гардидааст;

• дар байни мақомоти ҳифзи ҳуқуқ ҳангоми банду басти ҳуқуқвайронкунӣ мушкилиҳои бартарф менамояд.

Оқибатҳои иқдисодии лоиҳаи мазкур:

• муомилоти қонунии ғайриқонунӣ истеҳсол, тайёр кардан, коркард, соҳиб шудан, тасарруф, нигоҳ доштан, интиқол ё фиристодани  моддаҳои сахттаъсир   ба танзи медарорад.

Бо қабул гардидани лоиҳаи пешниҳодшуда татбиқи дуруст ва яксони мукаррароти конунгузории амалкунанда оид ба муомилоти қонунии ғайриқонунӣ истеҳсол, тайёр кардан, коркард, соҳиб шудан, тасарруф, нигоҳ доштан, интиқол ё фиристодани  моддаҳои сахттаъсир   мусоидат хохад намуд.

Бидуни ворид намудани чунин иловаҳо ҳал намудани мушкилиҳои ҷойдошта, инчунин танзими масъалаи мазкур ғайриимкон мебошад.